Во ноември 2025 година се оддржаа oсмите редовни локални избори на кои учествуваа 22 партии, 19 коалиции и 119 групи на избирачи. Под слоганот „Вистинскиот избор – Твојот човек! Твоето место! За твојата иднина!“, ВМРО-ДПМНЕ и Коалицијата за Обнова на Македонија остварија победи и добија градоначалнички мандати во 55 општини и град Скопје (12 градоначалнички мандати повеќе од минатите локални избори). Исто така, ВМРО-ДПМНЕ и Коалицијата за Обнова на Македонија освоија 550 советнички места (82 советнички места повеќе од минатите локални избори). Вкупно, ВМРО-ДПМНЕ и Коалицијата за Обнова на Македонија на овие локални избори добија 301.000 гласови (11.000 повеќе од минатите локални избори).

Локалната самоуправа е една од темелните вредности на уставниот поредок на Република Македонија. Уставот содржи пакет на одредби со кои се дефинира концептот на локалната самоуправа, се гарантира независноста на општините во остварувањето на нивните надлежности, како и специфичниот статус на Град Скопје. Македонија има едностепена локална самоуправа. Локалната самоуправа во Македонија е организирана во 80 општини и градот Скопје, како посебна единица на локалната самоуправа. 34 единици на локалната самоуправа се со седиште во град, а останатите 46 се со седиште во село. Сите општини, освен неколку, се основани за подрачје на повеќе населени места. Општините ги извршуваат своите надлежности преку органи избрани непосредно од граѓаните, за време од четири години. Органи на општината се: советот и градоначалникот.