Кандидатот за градоначалник на општина Карпош, Сотир Лукровски, утринава гостуваше на Радио Лидер, каде што даде јасна порака дека Карпош е зрел за промени, бидејќи анкетите се повеќе велат дека тој ќе биде идниот градоначалник на карпошани.

Лукровски истакна дел од проблемите со кои се соочуваат карпошани, но и посочи дека во неговата програма има решение за истите. Тој говореше за проблемот со водоснабдувањето, со оглед на тоа дека е зголемен бројот на жители во Карпош, тој ветува нови 2 резервоари во Бардовци и една во Нерези.

„Се планираат 2 нови резервоари во Бардовци и во висока зона Карпош, односно во Нерези. Ние немаме капацитет за вода, не пак да говориме за градба на згради. Мојот став е дека треба да се гради, меѓутоа тоа треба да е плански’’, соопшти Лукровски.

Проблемот со паркирањето во Карпош е голем предизвик за Лукровски, но решението го гледа во изградба на нови монтажни гаражи кои би го решиле проблемот со паркирањето, а во одреден дел воведување и на зонско паркирање.

Лукровски пред граѓаните вети многу работа, многу труд, пред се чесно и посветено.

„Можам да ветам многу работа, чесна работа, можам да ветам транспарентно работење, присуство меѓу граѓаните. Како човек, сакам да бидам меѓу луѓето и да го слушнам размислувањето. Ние и програмата ја правевме заедно со нив. Да го средиме административниот дел, да бидам помалку во канцеларија, да бидам меѓу граѓаните, да ги слушам проблемите и да ги решаваме заедно’’, заклучи Лукровски.