Дигиталната трансформација е неопходна за брз економски раст и развој. И со оглед на тоа, недвосмислен и јасен е патот на дигиталната трансформација, вели професорот Орце Симов и претседател на Комисија за информатичко општество, телекомуникации и АВУ на ВМРО – ДПМНЕ. 

На денешната трибина на тема „Дигитализацијата станува реалност во Македонија“, Симов истакна дека многу економски и стручни студии покажаа дека земјите со повисок степен на дигитална трансформација, полесно ги пребродуваат и се поотпорни во услови на криза.

„Во последниот временски период, ние живееме во времиња на кризи. Прво ја имавме здравствената криза, потоа се појави енергетска криза, финансиска криза, сега имаме криза на трошоци за живот. Во овој период многу економски и стручни студии покажаа дека земјите кои што се со повисок степен на дигитална трансформација, полесно ги пребродуваат кризите и се поотпорни во услови на криза. Компаниите кои што се со повисок степен на дигитализација, односно на дигитална трансформација, исто така покажуваат подобри економски резултати во услови на криза“, рече Симов.

Со оглед на тоа, додаде тој, јасно и недвосмислено е дека треба да одиме кон дигитална трансформација и на државните институции, а и на приватните компании.

Во однос на дигитализацијата на државните институции, Симов посочи дека во Македонија веќе интензивно се работи на дигиталната трансформација и дека тоа е пример што треба да го следат и приватните компании.

„Во државата веќе интензивно се работи на дигитализација, односно на дигитална трансформација на државните институции и тоа треба да го следат и приватните компании. Дигиталната трансформација значи дека секоја организација, независно дали зборуваме за државна институција или за приватна компанија ќе дава подобри и поквалитетни услуги кон своите корисници“, истакна Симов.