fbpx

Интервјуа

Кочоска: Владата ги задоцни мерките, не смееше толку долго да ги оставиме луѓето без приходи

Интервју на Гордана Кочоска Димитриеска дадено за „Фактор“

Верува во исправноста на политиките на нејзината партија ВМРО-ДПМНЕ, но и во претседателот Христијан Мицкоски, за кого има само пофални зборови. Сепак, вели дека и досега во текот на својот работен век, и сега кога е ангажирана во техничката Влада, но и во иднина, ќе се раководи само и единствено од законите, бројките и професионалните принципи. Не дозволила, ниту пак во иднина нема да дозволи никакви политички притисоци и влијанија. Ова во интервју за Фактор го тврди дополнителната заменичка министерка за финансии од редовите на ВМРО-ДПМНЕ, Гордана Димитриеска-Кочоска. Со неа разговаравме за причините заради кои одби да го стави својот потпис на поволниот заем на кредитот од Светска банка наменет за здравствените потреби и за економските мерки, за кој тврди дека од надлежните институции не ги добила потребните одговори и пресметки кои би ја увериле дека соодветно ќе се трошат средствата. Не смета дека на овој начин би се загрозила соработката со оваа за нас многу значајна финансиска институција, а во тој контекст го наведува и фактот што самата министерка за финансии Нина Ангеловска, го оставила повлекувањето на овој заем за после парламентарните избори. Еврообврзницата, пак, каде што го стави својот потпис, ќе го зголеми долгот на државата, но најбитно е за што ќе се трошат парите. За владините економски мерки смета дека се многу задоцнети, бидејќи според неа, ранливите многу долго беа оставени без пари. Димитриеска-Кочоска е убедена дека нејзината партија ќе ја однесе победата на изборите, но нема да го прифати условот за премиер - Албанец, дури и по цена да не може да формира Влада.

Голема политичка бура предизвика брзиот и поволен кредит од Светска банка од 90 милиони евра, кој требаше да и помогне на земјава во справување со големите проблеми предизвикани од корона кризата, а кој Вие одбивавте да го потпишете до последен момент. Дури и од Светска банка ве убедуваа дека парите од тој заем ќе бидат од голема корист за земјава. Зошто не потпишавте, и дали можеби ве раководеа чисто политички мотиви?

Димитриеска-Кочоска: Морам да тргнм од фактот дека јас не потпаѓам под политички влијанија, туку пред се сум професионалец кој и во минатото, а и во иднина, професионално ќе си ја врши својата работа и ќе постапува секогаш од професионален аспект и согласно закон. И апсолутно никогаш нема да отстапам од тој пат. Во однос на кредитот од Светска банка, станува збор за наменски кредит од 90 милиони евра. Кога вие имате наменски кредит, јасно е дека имаме некаква намена во позадина. И тука се отвори прашањето околу намената на истиот и соодвтните институции вклучени во кредитот требаше да ми одговорат која е намената на овој кредит, со конкретни пресметки, со цел да видиме каде ќе бидат насочени тие 90 милиони евра.

Одговорете ми искрено. Дали интимно сметавте дека треба да го ставите својот потпис на заемот, но имавте притисок од вашата матична партија ВМРО-ДПМНЕ да не го правите тоа, со цел да му се нанесе штета на Вашиот главен политички опонент?

Димитриеска-Кочоска: Како што споменав и претходно, јас сум пред се професионалец, кој професионално и ја извршува работата. Политички притисок не сум прифаќала во минатото, нема да прифаќам ни во иднина. Значи, доколку дојдам до ситуација да имам било каков политички притисок, кој не би можела и не би успеала да го изменаџирам и да ги убедам луѓето дека мојот став е исправен, јас би си заминала. Тоа е став што сум го имала, го имам и ќе го имам и во иднина. Морам да напоменам и нешто друго. Претседателот Мицкоски е човек со кој кога комуницираме, секој наш разговор почнува и завршува со тоа дека ние треба да работиме согласно со закон. Само луѓе кои не го познаваат можат да мислат дека тој е подготвен некому да му направи политички притисок. Тоа не е така. Така што, во конкретниов случај со Светска банка, јас со него сум имала само неколку кратки разговори, со цел да му објаснам што се случува и да не слуша од медиумите, туку да биде изворно информиран по однос на кредитот, и сите разговори завршувале со тоа што тој ќе кажел – „Горде најмногу си упатена, се да биде само во рамките на законот, со цел да не трпиш и ти реперкусии“. Така што, никогаш од него, а знам дека така би било и во иднина, нема да произлезе било каков политички притисок.

НЕ МИ ГИ ДАДОА ОДГОВОРИТЕ И ПРЕСМЕТКИТЕ ЗА КРЕДИТОТ

Овде не го спориме легалистичкиот момент. Сите знаеме дека согласно законот, Вие, како дополнителен заменик министер за финансии, имате право да не ставите потпис на кредитот. Прашањето ми беше дали Вие лично бевте убедена дека не треба да го ставите тој потпис?

Димитриеска-Кочоска: Значи јас на сите им кажав отворено. Доколку одговорат на прашањата што ги поставувам, јас ќе ставам потпис. И тука немаше никаква дилема. Да ми ги дадеа сите пресметки и да ми кажеа која е намената на кредитот, би било смешно и апсурдно да не го потпишам. Зошто да не го потпишам кога е од полза на државата.

Но како да ви ги дадат тие прецизни пресметки што ги барате, кога гледаме каква е сега здравствената состојба и колку се големи и секојдневно се менуваат здравствените потреби?

Димитриеска-Кочоска: Ние зборуваме за кредит за кој почнало да се преговара некаде во март. На 28 април јас за прв пат го добив документот, еден обичен документ, во кој имаше една информација раскажана, а беше ставен и договорот со своите составни делов. Така што во тој период имало простор да се подготват сите пресметки. Притоа, јас не барав слики од опремата, јас ги барав само калкулациите. Што значи тоа, на пример, набавка на 1.000 тестови или 2.000 маски, по цена таа и таа. Тоа можеле да го направат. Како го подготвија ребалансот на буџетот? Ова е истото. Ребалансот на буџетот се подготвувал на планирање на јавни набавки, потоа финансиските износи се преточуваат во буџетот, и тој се усвојува. На истиот принцип како што го подготвуваа ребалансот, и како што ги подготвуваат уредбите, на истиот принцип ќе се подготвеа и пресметките на наменскиот кредит. Повторно ќе кажам, станува збор за наменски кредит, ние мора да ја знаеме намената јасно и гласно во детали.

НЕ СЕ САМО ДРОНОВИТЕ, ИМА И МНОГУ ДРУГИ ОТВОРЕНИ ПРАШАЊА

Ги прочитавме Вашите аргументи дека дел од парите во заемот, околу 830 илјади евра, ќе се користат за дронови и за прехранбени пакети. Еве и да е така, дали требаше земјава да ја лишите од остатокот од 89 милиони евра поволен заем, со кои би се финансирале здравствените потреби кои ни се многу битни, особено сега кога гледаме дека клиниките се преполни, но и економскиот пакет мерки, со кои би се задржале работните места и би им се помогнало на ранливите категории?

Димитриеска-Кочоска: За да им биде јасно на сите, не станува збор само за тоа дека мене не ми беше јасно каде ќе се потрошат 830-те илјади евра. Еве да ги погледнеме математиките. Од 90 милиони евра колку што изнесува кредитот, 34 милиони евра се за здравство. Притоа во рамки на здравството имаме три компоненти, при што третата компонента се однесува на Фондот за здравство. Јас сега ќе ви цитирам точно за што е третата компонента „финансирање на придонесот за здравствено осигурување за корисници кои се припаднии на ранливите групи. Значи тука ни е јасно дека 10.640.000 евра се наменети за Фондот за здравство. Од 34 милиони евра, кога ќе ги одземете овие што се за Фондот за здравство, доаѓаме дека остануваат 23.410.000 евра. Во документот кој го добив како генерален, стои дека за здравство ќе бидат наменети 23.337.000 евра, така што 73 илјади евра не се совпаѓаат. Бидејќи платите на здравствените работници не се во рамки на тендер, а тука се тендерските податоци, барем така ми образложија во преписките, значи дека 73 илјади евра остануваат без намена, кои што можам да ги врзам со плативе за здравтвените работници. Прво ме убедуваа дека тие се предвидени во договорот. Е сега, што вели ставката – финансирање на зголемувањето на персоналот поради зголемениот број пациенти. Значи, се вели зголемување на персоналот, никаде не се вели дека тоа е за платите. Во нашите преписки секаде стои дека ќе имаме зголемување на платите на персоналот. И сега она што е клучно - тие мене според математиките кои ми ги даваат, велат дека 50 милиони денари ќе бидат наменети за зголемување на платите на оние здравствени работници кои директно биле поврзани со КОВИД-19. И сега, 73 илјади евра се 4,5 милиони денари. А 50 милиони денари се платите. Значи, не се работи само за тоа дека се дискутабилни 830-те илјади евра. Тука има еден куп отворени прашања. Каде се сега тука предвидени платите. Првин, каде им е намената во договорот, и потоа каде се во овој дел. И сега се поставува второто прашање. Ако 50-те милиони денари ги дадеме за здравствените работници, каде, во кој дел ќе скратиме, дали во опрема, во кревети, или во што.

Исто така, на едно од прашањата за тоа дека ќе се купат 50 кревети на Интензивна нега, добивам одговор дека еден кревет чини 50.000 евра. Тоа се 2,5 милиони евра. За мебел се предвидени 500.000 евра. Па затоа, и на Влада прашав, каде влегува оваа математика. Па имаше коментари дека креветите се мебел, но министерот тогаш објасни дека со креветите одела и некоја дополнителна опрема. Е сега, кој треба да ја издвои опремата? Тие треба јасно да ги направат пресметките и да кажат – ова влегива во овој дел, она во оној дел.

И да завршам. Јас на почетокот добив една табела која се состои од три шита, и ми рекоа дека треба да ја погледнам и тука се совпаѓаат математиките. Кога ќе ги соберете тие три дела, не одговараат на овој износ од 23 милиони денари. Јас побарав точно да ми прецизираат ка де кој дел влегува, но единствено што добив беше за лабораториската опрема, за која ми одговорија на 15 мај, каде што стои во која колона тоа да го видам. И тоа е на сума од 1.066.000 евра. Значи, како што одговорија, на овој принцип можеа да ги соберат и сите други работи. И затоа кај мене се постави прашање што калкулирале и што пресметувале, а јас не знам. И затоа јас инсистирам на конкретни пресметки.

Инаку, не бев вклучена во комуникацијата која ја имале ресорните министертва со Светска банка. Но, помина доволен период во кој требаше да знае Министерството за здравство каков план има и за што ќе биде намената на средствата. И тука не гледам проблем или причина зошто не ги дадоа пресметките.

Исто така, во нашите преписки, имаше мое прашање за надградбата на Мој термин, за што се предвидени 200 илјади евра. На 28 мај за тоа добивам одговор дека ќе набават за 30.000 евра софтвер и осум и пол месеци ќе ангажираат лица кои ќе го надградуваат софтверот. А малку подолу наведуваат сума за лекови од 1,2 милиони евра и за тоа кажуваат дека ќе биде за шест месеци. Е сега зошто да бараме лекови за болните од КОВИД-19 за шест месеци, а за 8,5 месеци бараме надградба на Мој термин. Има многу неусогласености кои требаше да ги објаснат за да ги разберам.

Не ли ги добивте потребните објаснувања на долгата седница на Владата, на која беше присутна и претставничката на Владата во Светска банка, Нина Фити-Неделковска. Дали и тоа не беше доволно?

Димитриеска-Кочоска: Видете, јас немав проблем со Светска банка ниту еднаш. Нина се јави како претставник на Владата во Светска банка. Значи, да не ги мешаме работите. Марко Мантованели е претставник на Светска банка во Македонија. Нина се јави и разговаравме, меѓутоа деталите околу кредитот ги имаат ресорните министерствата. Нина Фити ги дена деталите.

СУМ РАБОТЕЛА ВО БАНКА, НИКОЈ НЕ ДАВА КРЕДИТ БЕЗ ЈАСНИ ПРЕСМЕТКИ

Но дали не ви беше и нејзиниот збор доволен?

Димитриеска-Кочоска: Мислам дека треба да прекинеме со оваа практика да функционираме на збор. Треба да функционираме на принципот на документи. Јас кога ќе го потпишам кредитот, ставам потпис, и во подлог на тоа треба да имам документи. Јас уште во февруари кога се потпишува некои кредити, исто така и за нив не гледав некаква подлога. Тоа е принцип на работа. Јас сега го зборувам ова, но ќе го зборувам и после два месеци, за некој друг кредит. Ајде да ве прашам, отидете во некоја банка во Македонија и побарајте еден милион евра за вашата фирма. И кажете дека барате наменски кредит проекто финансирање. Јас сум работела повеќе од седум години во Стопанска банка, точно кредитирање на големи компании. Отидете и кажете дека го барате тоа, но без јасни пресметки. Вие можеби ќе имате пресметки, и секогаш ќе се јават можеби некои два, три или пет проценти нешто непредвидено. Но не може ние да не ги знаеме внатре кои се пресметките.

Госпоѓо Кочовска, Светска банка откако постои земјава е еден од нашите најзначајни партнери и најбитни финансиски ментори. Дали не стравувате дека на овој начин би можеле да ја доведете оваа наша пријателска институција да размислува да ја замрзне соработката со земјава, бидејќи имаше и такви брифинзи од Владата?

Димитриеска-Кочоска: За брифинзите на Владата најмногу сега би одговорила со писмово кое би ви го покжала, а е на министерката за финансии испратено до Светска банка, а кое го добив пред два дена, каде што таа кажува дека иако Државната изборна комисија одлучи дека министерката може и без мој потпис да го потпише кредитот со Светска банка, таа сепак, испрати писмо до СБ и кажа дека нема да го потпише кредитот, и ќе го остави за после избори. И тука, не би дискутирала повеќе. Што се однесува до комуникацијата со Светска банка, морам да напоменам дека сите работи излегоа надвор од контрола преку ете такви некои брифинзи што се правеа. Јас воопшто не сметам дека би се нарушила комуникацијата и одличната соработка што Македонија ја има со Светска банка.

ДИК ДОНЕСЕ ОДЛУКА ДЕКА МОЈОТ ПОТПИС НЕ Е НЕОПХОДЕН

Кога и каква одлука донесе Државната изборна комисија?

Димитриеска-Кочоска: Да, ДИК во петокот донесоа таква одлука. Но, би сакала да ве информирам и за следново. Два дена по ред имавме комуникација на Владата, првиот ден разговаравме, вториот ден рековме ќе одиме точка по точка ќе ги разгледуваме прашањата. Веќе вториот ден баравме и некои други податоци во Службен весник, и забележавме дека во февруари министерката веќе има потпишано еден кредит со Светска банка без мој потпис. И се постави прашањето ако тој кредит го потпишала, а веќе беше техничка Влада, значи зборуваме за 12 февруари 2020 година, зошто да не може овој кредит да го потпише.

Откако се отвори дискусија, Владата си побара мислење од ДИК, и ДИК одговори на тоа, со тоа што кажа јасно и гласно дека министерката може да го потпише кредитот без мој потпис. Значи, нема никаква дилема дека министерката може да потпише без мене, но иако може, еве го нејзиниот одговор. Зошто, ако е убедена дека итноста на кредитот е голема, и може сама да го потпише, таа не го направи тоа. Јас кога би била убедена во ова, би го потпишала. Ако зборуваме дека е за здравство, дека е битно, зошто да имаме дилеми. Јас не би имала дилеми никакви.

Затоа и решв ова јавно да го објавам. Премногу напади добив на оваа тема, а се отворено сум кажала. На еден документ работев шест часа, со сите коментари што треба и како треба за тој заем. И некои министри на владината седница на ова ми рекоа, па кој има време шест часа тоа да го работи. А јас прашувам, како поинаку, како би требало да сработиме за сума од 90 милиони евра. Сакам да ви кажам, тоа е пинцип на работа. Јас доколку сакала да го блокирам овој заем, дали ќе се замарав толку околу него.

Во контекст на Светска банка, сакам уште нешто да напомнам. Во февруари, во Собранието има еден кредит од Светска банка за земјоделство, од околу 50 милиони евра. Тој бил на собраниска сеница, значи во завршна фаза, и не се потпишл, од Х причини, нешто меѓу себе не се договориле внатре во парламентот. Е сега дали тоа ја наруши соработката со Светска банка? Сакам да кажам дека не се нарушува така лесно комуникација со одредена сериозна институција како што е Светска банка. Јас имав неколку разговори со Светска банка, па дури и директно со Вашингтон. Секогаш од првиот до последниот ден принципиелно сум стоела на ставот и луѓето ме разбраа. Тие разбираат дека јас барам податоци од нашите институции.

Еврообврзницата, пак, која е тешка дури 700 милиони евра, сепак го доби Вашиот потпис. Зошто во овој случај сметате дека земјава требаше да го направи ова задолжување, со многу повисок износ на средства?

Димитриеска-Кочоска: Станува збор за различен тип на кредити. Еврообврзницата е за поддршка на буџетскиот дефицит. Што значи буџетски дефицит? Тоа е кога вие не можете да соберете доволно приходи, а согласно кризата, ние сега не можеме да ги собереме приходите кои што се планирани, а притоа имавме расходи. И да не заборавиме, еврообврзницата ја потпишавме во период кога немавме ниту ребаланс на буџетот. Со такви проектирани расходи, логично е дека тие треба да бидат покриени. А кој ги усвојуваше расходите? Собранието, бидејќи тоа го гласаше буџетот. Така што јас тука немам дилема, бидејќи највисок законодавен орган во државата е Собранието. Тој го усвоил и јас единствено сум потпишала документ за да ги финансира расходите кои ги усвоил највисокиот законодавен орган.

Инаку, во делот на ребалансот јас имам забелешки во делот на кратењето кај ребалансот. Тука имам огромни забелешки. Требаше да се смогнат сили и да се направат поголеми кратења, за да има повеќе пари за стопанството. Јас сум од тие кои сметаат дека без стопанство, државата не може да опстане.

Во кој дел сметате дека требаше да се скрати повеќе?

Димитриеска-Кочоска: Од ставката стоки и услуги. Во таа ставка годинава имаме за 41 милиони евра планирани повќе пари со ребалансот, отколку реализацијата за 2019 година. Дали тоа не беа средства кои можеа да се скратат и да се пренаменат? Под претпоставка дека ние годинава ќе завршиме со исто трошење на стоки и услуги како лани. А дали трошиме како лани? Администрацијата не оди ниту на работа. Имате цели затворени министерства. Што трошат тие, освен она стандардното – струја, комуналии, но другото, како што се на пример тонери, хартија, не го трошат.

Побаравте ли да се скрати од таа ставка со ребалансот?

Димитриеска-Кочоска: Не бев вклучена комплетно во ребалансот на буџетот. Со министерката еднаш се имаме сретнато по однос на ребалансот и таа кажа дека не може да добијам ништо повеќе од тоа што го слушнав како информација од Владата. Кога се крателе средствата, тука имало многу дискусии и никој не сакал да скрати. Но, тоа се информации што треба Владата да си ги даде.

КОМУНИКАЦИЈАТА СО МИНИСТЕРКАТА МОЖЕ ДА БИДЕ И ПОДОБРА

Овој нов долг сигурно ќе го зголеми јавниот долг на земјава. Какво е Вашето мислење, дали со него земјава ќе дојде до ниво на задолженост кое ќе биде ризично и би можело да биде товар за идните генерации?

Димитриеска-Кочоска: Како економист, прво ќе кажам дека секое задолжување е долг за идните генерации. Тоа го опфаќа сето она што е направено и наназад, а што се прави и денеска. Меѓутоа, клучното при задолжувањето е како вие ќе ги трошите парите. Дали ќе ги употребувате за покривање на тековни расходи, или ќе ги користите за капитални инвестиции. За мене во оваа ситуација беше многу битно Владата да смогне сила и да направи поголема реализација на капиталните расходи. Јас за ова разговарав и со министерката неколку пати. Видете, ние надвор од овие пари што сега ги одобрувавме, имаме над една милијарда евра одобрени средства од меѓунродни финансиски институции за различни капитални инвестиции. И сега сите тие од икс причини се некако заглавени. Но до кога ќе ги одглавуваме. Во овој период додека беше корона кризата, голем дел од луѓето беа дома. Не можеше ли да се смогнат сили, со заедничка работа, да се одглават тие проекти и што повеќе да се реализираат барем капиталните инвестиции. Бидејќи таму мултипликаторот и забрзувањето на економијата и растот е многу поголем од отколку ако ги трошите парите за тековни расходи. Така што, клучот е тука, каде ќе ги намените средствата. По однос на процентот на јавниот долг од БДП, јас како човек кој работел во банка и имал комуникација и со голем број фирми, ќе кажам дека дури и во банка, кога ќе дојде одредена фирма и ќе побара кредит, а степенот на задолженост на фирмата бил многу висок, зависно од проектот, некогаш и прогледувате низ прсти и велите, да, ќе го исфинансираме овој проект затоа што има огромна додадена вредност и благодарение на приходите што ќе ги создаде во иднина, ќе го намали тој степен на задолженост. Инаку, внимавајте, јавниот долг може да достигне и до над 60 проценти во зависност од тоа како ќе заврши бруто-домашниот производ, бидејќи од една страна јавниот долг расте, а од друга БДП паѓа, и логично е дека ќе биде процентит висок. Но, пак ќе кажам, доколку задолжувањето е за работи кои што се клучни и ќе имаат додадена вредност за државата, тука нема дилема дека некогаш е добро да се задолжите.

Кога на стартот дојдовте на функцијата дополнителен заменик министер за финансии, како што вие објавувате во јавноста, имавте проблеми во соработката со министерката Нина Ангеловска и се жалевте дека не можете да ги добиете потребните податоци и документи што ви требаат во работата. Дали сега ги надминавте тие недоразбирања, во интерес на земјава која е во голема криза, или тие се уште постојат?

Димитриеска-Кочоска: Јас не гледам никакви поместувања во однос на минатиот период од аспект на документација и проток на документи. Тука не добиваме речиси никакви документи. Дури и оној пристап за е-Влада кој го барав и од кој би можела навремено да добивам информации за уредби и слично, се уште го немам. Еве на пример, дополнителната заменичка во МИОА, Невенка Стаменковска, има пристап до е-Влада, го доби веднаш од Дамјан Манчевски, а јас до ден денес немам добиено пристап до Е-Влада. Тоа повеќе од јасно кажува, иако овде зборувам од аспект на пристап до документи. Инаку, јас и министерката комуницираме, ако треба нешто да потпишам за кредитите - ќе се јави, ќе се видиме и слично.

Задоволни сте од комуникацијата со Ангеловска?

Димитриеска-Кочоска: Можеме и подобро.

МЕ ЗАГРИЖУВА ОНА ШТО СЕ СЛУЧУВА ВО ТИРЗ-ОВИТЕ

Владата очекува дека годинава економијата на земјава ќе падне за 3,4 отсто. Какви се Вашите и очекувањата на Вашата партија која ве номинираше на оваа позиција, дали можеби ќе имаме поголем економски пад, со оглед што првиот квартал го почнавме буквално со стагнација, односно со раст од 0,2 отсто?

Димитриеска-Кочоска: Токму така, во првиот квартал имавме стагнација, односно само 0,2 отсто раст, што за мене е многу загрижувачки, бидејќи два и пол месеци од тој период, ние во Македонија немавме негативни ефекти од одлуките на Владата врз бизнисот. Во смисла, до 18 март кога се затворија бизнисите, имаше период во кој се нормално функционираше, а сепак имаме стапка на раст од 0,2 отсто, што јасно кажува дека сме биле во некаква стагнација. Сега вториот кватртал, мислам дека податокот ќе биде страшен, бидејќи заради мерки на Владата, дел од бизнисите беа затворени.

Ме загрижува сериозно и она што се случува во ТИРЗ-овите, не заради ситуацијата кај нас, туку заради ситуацијата во Европа. Барем од оние информации што јас ги имам нема брзо да закрепнат, а тоа е многу важно за БДП, бидејќи тие со голем процент учествуваат во создавање на БДП.

Очекувате ли пад вод 15 отсто во вториот квартал?

Димитриеска-Кочоска: Можеби ќе биде и повеќе во вториот квартал. Така што, до крајот на годината, јас мислам дека падот на економијата ќе биде и поголем од оној што го предвиде Владата. Така зборуваат и нашите првични математики.

Владата донесе три сета економски мерки за помош на компаниите и на граѓаните погодени од кризата. Доколку не би биле политичар и функционер од опозицијата, туку обичен граѓанин, како ги оценувате мерките. Дали не мислите дека тие навистина биле добро дизајнирани?

Димитриеска-Кочоска: Знаете што, што јас и да кажам сега најискрено, тоа веднаш ќе се протолкува политички. Јас би рекла, треба да ги слушаме оние за кои мерките се наменети. Ние од коморите не слушнавме позитивни коментари, туку постојано одредени забелешки. Деновиве беше објавено дека имаме 80 илјади приговори за платежните картички. Слушам, а и сведок сум на ситуации, каде што едно исто лице добива платежни картички и по едн и по друга основа, и како вработено лице со минимални приходи, и како невработено. Зошто? Затоа што во март се уште бил вработено лице со минимални приходи, па преку податоците од УЈП, добива право на ваучери за туризам, а од друга страна, имаме ситуација каде што после 31 март тоа лице оди под Агенција за вработување затоа што останало без работа, и сега и оттаму добива платежна картичка како невработено лице. Значи, тоа е еден хаос кој настана и за кој сметам дека иако ситуацијата е тешка, не смееше да се случи, бидејќи ние сепак зборуваме за ранливи категории на граѓани или граѓани со понизок приход, и требаше многу повнимателно и поддговорно институциите да работат во овој период.

Морам да напоменам дека мерките се задоцнети, тука немам дилема по однос на тоа прашање. Никој не се праша во овој изминат период како овие луѓе го поминаа од месец март, или што се случуваше со нив во април.

И уште нешто. Многу ми е криво што не се прифати онаа предлог уредба која ВМРО-ДПМНЕ ја даде за државниот пензиски Фонд, односно средствата да останат кај него и да не се пренесуваат во приватните пензиски фондови, во периодов додека трае кризата. Тоа ќе беше многу битен момент. Зошто? Ако ние годинава треба од државниот пензиски фонд да исплатиме 10 милијарди денари, тоа се околу 150 до 160 милиони евра, замислете колку се тоа месечно, тие пари да не ги префрлаа, туку да ги оставаа, зошто не овие платежни картички кои сега ги даваат, да не ги дадеа во тој период. Значи, сето тоа е задоцнување. Никој во ситуацијава не се прашува како овие луѓе го поминаа април, како го поминаа мај. Имаме ситуации каде што над 30 илјади граѓани, и ова се потврден податоци, оние кои што се во редовен работен однос, не земале плата, во текот на цел мај, за април. Значи, ако требало до 15 мај да ја земат априлската плата, тие не ја зеле ни до крајот на мај. Така што, од тој аспект мислам дека мерките се задоцнети. А зошто се задоцнети – заради тоа што првин во јануари и февруари трошевме како што трошевме, па направивме огромен буџетски дефицит. Понатаму, во март и во април, еве јас ќе зборувам лично за себе, ја советував министерката, кога ја имавме првата средба, мислам на 18 март, кога ме повика да ми каже дека ќе одиме со задолжување кај комерцијалните банки, а јас и кажав дека ќе потпишам и нема апсолутно никаков проблем, знаејќи дека паѓаат приходите, јас уште тогаш и реков – барај пари најбрзо што можеш, бидејќи ќе дојдеме во ваква ситуација. А ние не смееме да оставиме ниту едно домаќинство без храна, без минимален приход. И тука нема дилема. Затоа, велам дека од тој аспект, мерките се многу задоцнети. Требаше да се реагира многу побрзо.

Која мерка би ја издвоиле како најдобра, а која како најнесреќно скроена и непотребна?

Димитриеска-Кочоска: Не можам да кажам, бидејќи ние сега зборуваме за различни категории. Зборуваме за ученици, за претпријатија...Тие не се споредливи.

МИЦКОСКИ ПО НИ ЕДНА ЦЕНА НЕМА ДА ПРИФАТИ ПРЕМИЕР АЛБАНЕЦ

Госпоѓо Кочовска, Вие не сте на пратеничката листа на ВМРО-ДПМНЕ за претстојните парламентарни избори. Зошто е така, со оглед што таа партија Ве постави на функцијата дополнителен заменик за финансии?

Димитриеска-Кочоска: Јас сум човек кој е професионалец и кој сака да даде максимум таму каде што е најкомотен и каде што знае што прави. Јас себе си не се гледам во законодавната власт воопшто, ниту сега, ниту во иднина. Во извршната – да, затоа што сметам дека мојот капацитет таму може да го даде својот максимум. И тука воопшто немаше дилема. Но, не сум само јас таа која што не е на листа. Најверојатно претседателот во исто време донесе одлука никој од овие министри и дополнителни заменици во техничката Влада, да не са најде на листа. Но повторувам, и да беше одлуката на претседтелот различна, јас себеси не се гледам таму и не сакам да бидам некаде каде што едноставно нема да се пронајдам. Мислам дека претседателот со направи одлични одлуки и пресече правилно, бидејќи тој точно го знае капацитетот на секој од нас. Јас пак ќе речам, не знам што би правела во парламентот. Не би го дала својот маскимум, не би била продуктивна. И фер е во нашава држава еднаш да се признае и да не се трча, сакам ваму, сакам таму, туку да се каже – јас тука можам, и тоа е чесно. Јас не мислам дека знам се, туку знам економија, и тоа одредена област од економијата.

Што очекувате од изборите кои ќе се одржат на 15 јули, дали очекувате дека Вашата партија ќе победи, и дали во случај вашата партија да формира Влада, Вие се гледате на функцијата идна министерка за финансии?

Димитриеска-Кочоска: Убедена сум сто отсто дека ВМРО-ДПМНЕ ќе оствари убедлива победа на изборите. Тука апсолутно немсм никаква дилема. И исто така сум сигурна дека ВМРО-ДПМНЕ ќе формира влада. Во однос на тоа каде се гледам себе си, јас би рекла вака – верувам во претседтелот Мицкоски, и знам дека тој, познавајќи го капацитетот на сите нас, ќе направи таков состав на Влада, кој ќе биде на ниво и на висината на задачата и ќе може најсоодветно да одговори на сите предизвици кои стојат пред државава, бидејќи мислам дека таа влада ќе го има најтешкиот период во историјата, бидејќи ќе дојде до промена на власта во период на пандемија, во период кога имаме проблем во економијта, еден куп фирми затворени, еден куп невработени и тоа ќе продолжи да трае. Тка што, знам дека тоа што ќе го одлучи претседтелот Мицкоски, ќе биде најисправно. Како ќе одлучи тој, јас секогаш ќе бидам тука да помогнам. И пак ќе речам, тој точно го знае капацитетот на сите нас, и ќе знае најправилно да ги донесе сите одлуки.

Бидејќи толку добро го познавате Мицкоски, Ве молам да ми одговорите на ова прашање. Со оглед што ДУИ се изјаснија дека нивни главен услов за коалицирање со било која од македонските партии ќе им биде премиер – Албанец, дали претседателот Мицкоски ќе го прифати тој услов?

Димитриеска-Кочоска: Не. Не.

По цена и да не може да формира влада?

Димитриеска-Кочоска: Да. Нема да прифати по цена и да не формира влада. Тоа е сигурно. Јас мислам дека и самиот Мицкоски во неколку наврати ова го има коментирано. Нема да прифати.

Последни новости